Noti ekki illgresiseyði án nauðsynjar
Setja bókamerki
Kristín Linda Árnadóttir, forstjóri Umhverfisstofnunar, segir að afgerandi ákvarðanir verði ekki teknar hér á landi um lögmæti illgresiseyða sem innihalda glýfosat fyrr en niðurstöður viðeigandi stofnana í Evrópu verði leiddar í ljós um svokallað Roundup-mál. Umhverfisstofnun hvetur fólk, eins og áður, til þess að draga úr eða hætta notkun á illgresiseyði að nauðsynjalausu.
Monsanto, stærsti efnaframleiðandi til landbúnaðar í Bandaríkjunum, hefur verið dæmt af dómstól í Kaliforníu til þess að greiða manni 289 milljónir dala, sem samsvarar rúmum 30 milljörðum kr., í skaðabætur. Maðurinn hélt því fram að hann hefði fengið krabbamein eftir að hafa notað plöntueyðinn Roundup sem innihélt glýfosat. Monsato hyggst áfrýja dóminum.
Efnið umdeilt innan Evrópusambandsins
Notkun glýfosats hefur verið afar umdeild síðustu ár og mikið deilt um lögmæti efnisins innan Evrópusambandsins. Aðildarríki Evrópusambandsins felldu leyfi til notkunar glýfosats úr gildi á síðasta ári en kosningunni var áfrýjað til framkvæmdastjórnar sambandsins sem tók ákvörðun um að leyfa notkun efnisins innan sambandsins áfram næstu fimm árin.
„Þessi dómur í Bandaríkjunum hefur í sjálfu sér ekkert lagalegt gildi hér á landi. Það er samevrópskt regluverk hér í gildi og framkvæmdastjórn Evrópusambandsins tók ákvörðun í nóvember síðastliðnum um að heimila notkun glýfosats næstu fimm ár eftir mjög ítarlega úttekt og áhættumat sem var framkvæmt af Þjóðverjum,“ segir Kristín Linda í samtali við mbl.is.
Fylgjast með framvindu málsins hjá lykilstofnunum
Kristín Linda segir að í kjölfarið hafi verið gefin út sérstök álit sem studdu niðurstöðu framkvæmdastjórnarinnar. „Álitin voru gefin út bæði af matvælaöryggisstofnun Evrópu og Efnastofnun Evrópu þar sem menn tóku undir niðurstöðu áhættumatsins. Við munum fylgjast með málinu en gerum ekki ráð fyrir því að það heyrist neitt frá þessum lykilstofnunum í Evrópu fyrr en eftir helgi.“
Umhverfisstofnun hvetur fólk til þess að draga úr notkun eða hætta notkun á illgresiseyði, enda segir Kristín Linda það mikilvægt markmið að draga úr notkun á illgresiseyðum almennt. Betri leið sé hreinlega að reyta arfann með handafli eða beita öðrum aðferðum þar sem efni eru ekki notuð.
Búið að bólusetja börn alla helgina
Myndskeið: „Fólk var komið ískyggilega nálægt“
„Mér finnst Halla Hrund svona Vigdísarleg“
„Þetta náttúrulega endar með ósköpum“
Tæknideild komin norður vegna andlátsins
Áverkar bentu til manndráps
Áköf mótmæli í bandarískum háskólum
Átta morðmál á aðeins tólf mánuðum