Brunavörnum Árnessýslu barst tilkynning rétt fyrir klukkan níu í kvöld um eldsvoða rétt við Flúðir en þar kviknaði í pökkunarhúsi að Reykjaflöt á Flúðum.
Pétur Pétursson, slökkviliðsstjóri Brunavarna Árnessýslu, segir að um sé að ræða garðyrkjustöð og kviknað hafi í pökkunarhúsi sem er áfast gróðurhúsi.
„Slökkviliðsmenn hafa náð tökum á eldinum og eru að klára að slökkva þetta þótt það verði talsverð vinna við að slökkva í glæðunum,“ segir Pétur.
Hann bætir því við að íbúabyggð hafi ekki verið í hættu út af eldinum og auk þess hafi vindátt verið slökkviliðsmönnum hagstæð.
Uppfært klukkan 6:30
Slökkvistarfi lauk klukkan 00:30 í nótt.