Vinningshafarnir heppnu sem unnu fimmfaldan Lottópott um síðustu helgi eru búnir að gefa sig fram. Þau unnu 51,7 milljónir króna. Þetta kemur fram í tilkynningu frá Íslenskri getspá.
Hjónin heppnu voru gestkomandi á Norðurlandi að njóta Fiskidagsins mikla á Dalvík er þau keyptu vinningsmiðann í Hagkaupum á Akureyri. Þangað höfðu þau skroppið frá á föstudeginum til þess að kaupa „eitthvað gott á grillið“ ásamt vinahjónum. Vinahjónin ákváðu að kaupa Lottómiða og vinningshafarnir ákváðu að grípa einn miða líka.
Því segjast þau í raun þakka vinum sínum vinninginn. Í tilkynningu Íslenskrar getspár segir að til þess að fagna vinningnum ætli hjónin að skella sér á Bæjarins bestu og fá sér tvær pylsur með öllu og kók, en annað sé ekki búið að ákveða, enda nægur tími til þess.