Rúm 42% þátttakenda í könnun MMR um ferðavenjur Íslendinga í sumarfríinu kváðust ætla að ferðast bæði innan- og utanlands.
Er þetta 3% aukning frá síðustu könnun sem gerð var fyrir ári. Þeim fækkaði um 3% milli ára sem kváðust eingöngu ætla að ferðast innanlands en hlutfall þeirra sem ætluðu eingöngu að ferðast utanlands stóð í stað, að því er fram kemur í Morgunblaðinu í dag.
Stuðningsfólk Framsóknarflokksins var líklegra en aðrir hópar til að ætla eingöngu að ferðast innanlands í fríinu, eða 48%. Þá reyndist stuðningsfólk Flokks fólksins líklegra en aðrir hópar til að ætla eingöngu að ferðast utanlands, eða 20%. Stuðningsfólk Miðflokksins er líklegra en aðrir til að ferðast bæði innanlands og utan, eða 60%.