Félagið á ekki lögvarða hagsmuni

Kvosin, félag sem beitir sér fyrir umhverfisvernd á samnefndu svæði í miðborg Reykjavíkur, telst ekki eiga lögvarða hagsmuni til að standa að kæru um lögmæti deiliskipulagsbreytingar á Landsímareit eða vegna samþykktar byggingarleyfis á reitnum.

Þetta var niðurstaða úrskurðarnefndar umhverfis- og auðlindamála á fundi í síðustu viku. Vísaði nefndin málinu frá af þeim sökum, að því er fram kemur í umfjöllun um mál þetta í Morgunblaðinu í dag.

Félagið Kvosin fer fyrir hópi fólks sem andmælt hefur fyrirhugaðri hótelbyggingu í hluta hins forna Víkurkirkjugarðs við Kirkjustræti. Formaður félagsins er Friðrik Ólafsson, fyrrverandi skrifstofustjóri Alþingis. Hefur lögmaður félagsins, Ragnar Aðalsteinsson, reynt að fá leyfisveitingum borgaryfirvalda hnekkt en ekki orðið ágengt.