Allir neita sök í gagnaversmálinu
Setja bókamerki
Allir þeir sem ákærðir eru í einu stærsta þjófnaðarmáli síðari ára hér á landi, þar sem meðal annars var stolið 600 öflugum bitcoin-leitarvélum í lok síðasta árs og upphafi þessa, neituðu sök í máli sem lögreglustjórinn á Suðurnesjum höfðaði á hendur þeim. Málið var þingfest í Héraðsdómi Reykjaness í gær þar sem tveir ákærðu komu fyrir dómara og neituðu sök. Í gær var einnig aflétt farbanni yfir einum ákærða.
Hinir fimm, þar á meðal Sindri Þór Stefánsson sem strauk úr fangelsinu á Sogni í vor, komu fyrir dómara í dag og neituðu jafnframt sök. Þá höfnuðu þeir allir bótakröfu í málinu. Sindri er áfram í farbanni.
Alda Hrönn Jóhannsdóttir lagði fram skjöl í fimm liðum fyrir hönd lögreglustjórans á Suðurnesjum fyrir dóminn í dag, þar á meðal sakavottorð eins ákærða og skýrslu um notkun símtækja og símanúmera ákærðu. Einnig upplýsingaskýrslu vegna samtals tveggja ákærðu.
Ákæra í málinu var gefin út í byrjun júlí, en hún var ekki birt sakborningum fyrr en í lok ágúst og varðar innbrot í fjögur gagnaver þrjár nætur í desember og janúar og tilraunir til tveggja innbrota í viðbót. Yfir tvö þúsund tölvuíhlutum er sagt hafa verið stolið í innbrotunum.
Fyrst var brotist inn dagana 5. og 6. desember í gagnaver Algrim Consulting slf. og BDC Mining ehf., sem bæði eru á Ásbrú. Þá hafi verið reynt, án árangurs, að fara inn í annað gagnaver BDC Mining á tímabilinu 5.-10. desember.
Aðfaranótt 15. desember hafi svo verið farið inn í gagnaver AVK ehf. í Borgarnesi og aðfaranótt annars í jólum hafi aftur verið reynt við bæði gagnaver BDC Mining ehf. á Ásbrú. Mennirnir hafi hins vegar flúið er þjófavarnakerfi fór í gang.
Síðasta innbrotið var svo framið aðfaranótt 16. janúar og var það í gagnaveri Advania Data Center á Ásbrú. Ákærðu munu hafa dulbúið sig sem öryggisverði þegar þeir brutust inn í eitt gagnaverið.
Lögmenn fá frest til að skila greinargerð í málinu til 4. október næstkomandi.
Verðbólgan komin niður í 6%
Handtekin eftir að tvö börn fundust látin
Mest spennandi kosningar í áratugi
Hönnun sem bætir líf manna
„Á réttri leið en nokkuð í land ennþá“
Æskuvinur Íslendings myrtur í Noregi
Moses Hightower og Prins Póló gefa út eyjalag
Myndir: Reynir við heimsmet í Hlíðarfjalli í dag