Galdramaðurinn Einar Mikael Sverrisson hefur opnað Galdraskólann sinn að nýju eftir þriggja ára hlé. Skólinn var afar vel sóttur á sínum tíma og hefur Einar kennt yfir 12.000 börnum ýmis töfrabrögð á síðustu árum.
Sjálfur byrjaði Einar ekki að galdra fyrr en hann var 22 ára gamall en hann segir það mjög gefandi að leyfa yngri kynslóðinni að fá innsýn í heim töfranna.
„Ég átti mér tvo drauma þegar ég var yngri: að verða smiður eins og pabbi og kaupa mér íbúð. Ég ákvað þetta þegar ég var 11 ára og náði þessum markmiðum þegar ég var 21 árs. Síðan kom einhver maður í sjónvarpinu og sagði „Guð blessi Ísland“ og þá hrundi allt. Það var enga smíðavinnu að fá og þá uppgötvaði ég þennan stórkostlega hlut. Ég fékk töfra inn í líf mitt og hef verið að vinna við þetta síðastliðin níu ár; að töfravæða Ísland, gleðja fólk og koma því á óvart,“ segir Einar.
Sjá viðtal við Einar Mikael í heild á baksíðu Morgunblaðsins í dag.