Fyrstu starfsmenn Sláturfélags Suðurlands á Hvolsvelli fluttu inn í nýjar leiguíbúðir sem fyrirtækið hefur byggt við Gunnarsgerði á dögunum. Um er að ræða fyrstu átta íbúðirnar af 24 sem félagið reisir fyrir starfsfólk sitt á Hvolsvelli, að því er segir í tilkynningu frá SS.
Allt frá því að SS flutti kjötvinnslu sína á Hvolsvöll 1991 hefur sveitarfélagið Rangárþing eystra stutt dyggilega við uppbyggingu starfseminnar, nú síðast með úthlutun lóða undir leiguíbúðirnar í samræmi við viljayfirlýsingu sem var undirrituð á 110 ára afmæli SS 28. janúar 2017.
Hver íbúð er um 50 fermetrar og eru þær afhentar fullbúnar utan- og innanhúss. Mikil áhersla er lögð á einfaldleika, notagildi og einfalda hönnun í íbúðunum.
Von fyrirtækisins er að íbúðirnar falli vel að þörfum starfsmanna og samfélagsins á Hvolsvelli, þar sem þensla er á húsnæðismarkaði eins og annars staðar. Framkvæmdir við næstu átta íbúðir eru þegar hafnar.