Pysjum bjargað í Vestmannaeyjum

Pysjutíðin stendur sem hæst um þessar mundir í Vestmannaeyjum og hafa margir Eyjamenn gert sér glaðan dag og bjargað pysjum.

Karen Lynn Velas líffræðingur starfar í Vestmannaeyjum í sumar við að bjarga pysjum, þó á annan hátt en tíðkast í bæjarfélaginu. Hún hreinsar þær pysjur sem verða fyrir ýmsum óhreinindum, aðallega olíu og grút.

„Þetta er mikið vandamál. Þær villast í bæinn og auðvitað tekur samfélagið mjög vel á móti þeim en það er leiðindamál að þær verði óhreinar. Flestar þeirra finnast við höfnina.“

Karen var á landinu síðasta sumar í sömu erindagjörðum og stefnir á að koma á hverju sumri. Hún fékk þjálfun í að þrífa dýrin hjá stofnun í Bandaríkjunum sem sérhæfir sig í að annast villt dýr sem verða fyrir skaða eða óhreinindum af völdum olíu.

Sjá viðtal við Karen Lynn Velas í heild á baksíðu Morgunblaðsins ídag.