Gæsluvarðhald yfir manni sem er grunaður um gróft kynferðisbrot sem getur varðað allt að 16 ára fangelsi hefur verið framlengt til 3. október.
Þetta staðfestir Kolbrún Benediktsdóttir varahéraðssaksóknari.
Þennan sama dag rennur út tólf vikna frestur ákæruvaldsins til að gefa út ákæru. Maðurinn hefur setið í gæsluvarðhaldi síðan 11. júlí og átti það að renna út í gær. Héraðssaksóknari fékk málið á sitt borð á mánudaginn eftir að rannsókn lögreglunnar á Suðurnesjum lauk.
Maðurinn er einnig grunaður um fleiri kynferðisbrot gegn brotaþolanum, sem og ólögráða barni. Fram kom í fréttum RÚV í síðasta mánuði að brotaþolarnir séu báðir börn á grunnskólaaldri.
Í greinargerð lögreglustjóra í úrskurði Héraðsdóms Suðurnesja í síðasta mánuði er brotaþolinn sagður hafa komið á lögreglustöð og lagt fram kæru á hendur manninum og konu vegna kynferðisbrota sem hafi verið gróf og staðið yfir með reglubundnum hætti. Sama dag lagði annar einstaklingur fram kæru gegn kærða og sömu konu fyrir kynferðisbrot og ofbeldisbrot gegn ólögráða barni.
Kærði og konan voru bæði yfirheyrð og eru sögð hafa játað, á mismunandi tíma, brot gegn fyrstnefnda brotaþolanum.