Hætt við göngugötur í miðborginni í vetur

Horfið hefur verið frá því að fram­lengja út árið það fyr­ir­komu­lag sem verið hef­ur á göngu­göt­um í miðbæn­um í sumar. Í fréttatilkynningu sem Reykjavíkurborg sendi frá sér í dag kemur fram að tímabili göngugatna í miðborginni ljúki 1. október næstkomandi og þá verði um leið opnað aftur fyrir bílaumferð. Tillaga um varanlegar göngugötur verði hins vegar mótuð í vetur og muni liggja fyrir í vor.

Morgunblaðið greindi frá því í síðustu viku að afgreiðslu skipulags- og samgönguráðs á til­lögu skrif­stofu sam­göngu­stjóra og borg­ar­hönn­un­ar um að fram­lengja göngugötufyrirkomulagið út árið hefði verið frestað. Sagði Krist­ín Soffía Jóns­dótt­ir, full­trúi Sam­fylk­ing­ar­inn­ar í ráðinu, við það tækifæri að skýr­ustu skila­boðin sem borgaryfirvöld geti sent sé að hafa göt­urn­ar sem göngu­göt­ur áfram og fá reynslu á þær í stað þess að taka upp eitt­hvert milli­bils­ástand.

Frétt af mbl.is

Vilja fara í raunverulegt samráð

Trúum því að samráð sé rétta leiðin

Eyþór Lax­dal Arn­alds, full­trúi Sjálf­stæðis­flokks­ins í skipu­lags- og sam­gönguráði Reykja­vík­ur, sagði í samtali við mbl.is í kvöld að málið hafi ekki verið tekið fyrir á ný í skipu­lags- og sam­gönguráði og að sér sé ekki kunnugt um hvers vegna hafi verið hætt við að hafa göngugötufyrirkomulagið áfram í vetur.

„Við bókuðum mótmæli á fundinum í síðustu viku af því að það hafði verið samþykkt í borgarstjórn að ekki hefði verið haft ítarlegt samráð íbúa, kaupmenn og aðra hópa, eins og aldraða og fatlaða sem þurfa að komast leiðar sinnar,“ segir Eyþór. Í kjölfarið hafi afgreiðslu skipulags- og samgönguráðs verið frestað. „Svo kom tilkynning núna áðan um að hætt hefði verið við lokunina í vetur.“

Hann kveðst ánægður með að hætt hafi verið við göngugötufyrirkomulagið í vetur. „Þá gefst vonandi tími til að ræða við kaupmenn og íbúa og hlusta á aðra sem þurfa að komast um,“ segir hann. „Þetta er mjög umdeilt mál og við trúum því að samráð sé rétta leiðin þegar þannig er.“

Í tilkynningu borgarinnar segir að umhverfis- og skipulagssviði hafi nýlega verið falið af borgarráði að útfæra tillögur að göngugötum til framtíðar á völdum svæðum í miðborginni og að í samráðsferlinu muni hagsmunaaðilum gefast kostur á að taka þátt í hönnunarferlinu og haldnir verði vinnustofufundir í tengslum við málið og sérstakur opnunarfundur verkefnisins verði í október.

„Hönnunin mun taka mið af bættu aðgengi inn í verslanir þar sem því verður við komið. Samhliða verður unnið deiliskipulag fyrir þær göngugötur sem verða til framtíðar,“ segir í tilkynningunni. „Tekið verður  tillit til vörulosunar og annarra þátta. Þá verður hugað að útiveitinga- og markaðssvæði á þessum götum, sögulegum tengingum og ýmsu öðru sem göngugöturnar bjóða upp á.“

Markmiðið sé að efla miðborgina, auka vellíðan vegfarenda og bæta aðgengi að verslun og þjónustu.

• Blogga um frétt