Framkvæmdarstjóri Veitna ohf. hefur svarað athugasemdum sem fyrirtækinu barst frá Verkfræðingafélagi Íslands (VFÍ) vegna menntunarkrafna til stjórnendastarfa sem verið er að ráða í. VFÍ taldi Veitur gera sérfræðiþekkingu lágt undir höfði.
Veitur auglýstu fjórar stöður forstöðumanna hjá fyrirtækinu lausar til umsókna. Um er að ræða forstöðumann rafveitu, forstöðumann vatnsveitu, forstöðumann stefnu og árangurs, og forstöðumann fráveitu.
VFÍ gerði athugasemdir við menntunar- og hæfniskröfur sem komu fram í auglýsingunni. Í auglýsingunni segir: „Tæknileg innsýn skiptir máli en sérfræðiþekkingar ekki krafist.“
Í athugasemdum VFÍ kom fram að hafa verði í huga að þessir einstaklingar eigi að leiða uppbyggingu og viðhald, tækniþróun og nýsköpun í mikilvægum innviðum samfélagsins og erfitt sé að sjá hvernig því hlutverki verði sinnt án sérfræðiþekkingar sem byggir á grunni viðurkenndrar háskólamenntunar í tæknifræði eða verkfræði.
Athugasemdirnar voru sendar stjórn Veitna en hún vísaði erindinu til framkvæmdarstjóra þar sem mannauðsmál eru ekki á forræði stjórnar.
Framkvæmdarstjóri Veitna, Inga Dóra Hrólfsdóttir, hefur nú svarað athugasemdum VFÍ og þar segir:
„Veitur eru stór vinnustaður og þar vinnur m.a. mikill fjöldi verk- og tæknifræðinga að fjölbreyttum verkefnum.
Við leitum nú að stjórnendum til að leiða teymi sérfræðinga sem eru með mikla reynslu og djúpa þekkingu á sínu sviði. Verk- og tæknifræðimenntun er góður grunnur fyrir stjórnun í tækniumhverfi en fyrirfram viljum við ekki útiloka að önnur menntun komi þar líka til greina.
Við vonumst til að fá umsóknir frá fjölbreyttum hópi verkfræðinga, tæknifræðinga og öðrum sem hafa brennandi áhuga á viðfangsefnum Veitna og vilja móta með okkur snjalla framtíð.“