Hlúð var að veikum og slösuðum böngsum á Bangsaspítalanum í dag sem starfræktur var á þremur heilsugæslum á höfuðborgarsvæðinu. Á Bangsaspítalann lagði fjöldi barna leið sína til þess að fylgja böngsunum sínum til læknis og meira að segja lét forseti Íslands, Guðni Th. Jóhannesson, sig ekki vanta á Bangsaspítalann.
Bangsaspítalinn, sem lýðheilsufélag læknanema stendur fyrir, er haldinn ár hvert og er krökkum boðið að koma þangað til þess að sækja alhliða læknisaðstoð fyrir bangsana sína. Sumir bangsarnir þurftu á plástri að halda eða öndunarhlustun og enn aðrir þurftu að fara í röntgenmyndatöku.
Bangsaspítalinn er haldinn til þess að fyrirbyggja hræðslu barna gagnvart heilbrigðiskerfinu, stuðla að jákvæðu viðhorfi barna gagnvart heilbrigðisstarfsfólki og veita þeim innsýn í heilbrigðisstarfsemi. Þá er Bangsaspítalinn jafnframt hugsaður sem samskiptaæfing fyrir fyrsta árs læknanema í að ræða við börn.