Snjókomu spáð á Hellisheiði

Spáð er slyddu eða snjókomu til fjalla á Norður- og Norðausturlandi með morgninum og versnandi akstursskilyrðum. Einnig má búast við snjókomu um tíma á Hellisheiði. Lögreglan á Akureyri leitaði eftir aðstoð verktaka við að festa þakplötur í nótt eftir að þar hvessti skyndilega eftir miðnætti.

Að sögn lögreglu fóru lausamunir að fjúka í nýbyggingum í Hagahverfi, sem er sunnan Naustahverfis. Um er að ræða hverfi í byggingu. Mjög gott veður er núna á Akureyri og ekki urðu teljandi skemmdir af völdum roksins í bænum í nótt.

Gul viðvörun er í gildi frá klukkan 8 til klukkan 14 á Norðurlandi eystra en þar má búast við talsverðri snjókomu til fjalla með takmörkuðu eða lélegu skyggni og versnandi akstursskilyrðum. Slydda eða rigning við sjávarsíðuna. Sama viðvörun er í gildi fyrir Austurland að Glettingi frá klukkan 9 til 16 í dag.

Lægð gengur yfir landið í dag, með rigningu eða skúrum en slyddu eða snjókomu á fjallvegum norðan til á landinu. Lægðinni fylgir einnig allhvöss eða hvöss suðvestanátt sunnanlands og síðar einnig á Austurlandi, en hægari vindur í öðrum landshlutum. Hiti 1 til 10 stig, mildast syðst. Vestan 3-10 á morgun og dálitlar skúrir eða slydduél, en léttskýjað suðaustanlands. Litlar breytingar á veðri á fimmtudag, en á föstudag er spáð suðvestanhvassviðri með talsverðri rigningu sunnan og vestan til á landinu, segir í hugleiðingum veðurfræðings á Veðurstofu Íslands.

• Blogga um frétt