„Ég er bara rosalega glöð og ánægð. Þetta er náttúrulega búið að vera í fanginu á mér í mörg mörg ár. Ég bara óska allri þjóðinni til hamingju með þetta,“ sagði Sjöfn Sigurbjörnsdóttir, ekkja Tryggva Rúnars Leifssonar, eftir niðurstöðu Hæstaréttar í endurupptöku á Guðmundar- og Geirfinnsmáli í dag. „Núna vita allir sem ég vissi að þetta var bara bull. Ég lagði alltaf upp með það að nafn hans yrði hreinsað og það er búið að gera.“
Fimm dómarar í Hæstarétti komust í dag að þeirri niðurstöðu að sýkna bæri Kristján Viðar Júlíusson, Sævar Marinó Ciesielski, Tryggva Rúnar Leifsson, Albert Klahn Skaftason og Guðjón Skarphéðinsson af öllum sakargiftum.