„Þungt hljóð í okkar fólki“

Flugfreyjufélag Íslands fordæmir ákvörðun Icelandair um að segja upp flugfreyjum og flugþjónum í hlutastörfum sem ekki eru tilbúnar til að ráða sig í fulla vinnu hjá flugfélaginu. Í ályktun félagsins sem var samþykkt á fjölmennum félagsfundi í gær er skorað á Icelandair að draga ákvörðunina til baka.

Vika er liðin síðan Flugfreyjufélag Íslands fundaði á opnum fundi í Hlíðarsmára.

Frétt af mbl.is

Hörkumæting og samstaðan greinileg

„Um er að ræða alvarlegt brot á kjarasamningsbundnum réttindum, sem verða ekki tekin af með einhliða þvingunaraðgerðum. Aðgerðir þessar ganga þvert á þá umræðu í samfélaginu, bæði af hálfu atvinnurekanda og launþegahreyfingarinnar um styttingu vinnuviku og sveigjanlegan vinnutíma,“ segir í ályktuninni.

Þar er einnig skorað á Icelandair að ganga til viðræðna við FFÍ vegna aðhaldsaðgerða með vísan í bréf sem stjórn Flugfreyjufélags Íslands sendi forsvarsmönnum Icelandair 12. september.

Berglind Hafsteinsdóttir, formaður Flugfreyjufélags Íslands. Ljósmynd/Af heimasíðu Flugfreyjufélagsins

Stefna fyrir félagsdóm í næstu viku

Berglind Hafsteinsdóttir, formaður Flugfreyjufélags Íslands, segir í samtali við mbl.is að málinu verði vonandi stefnt fyrir Félagsdóm í næstu viku. Eftir atvikum verður málinu stefnt til annarra eftirlitsstofnana, segir hún, og á þar við Jafnréttisstofu út frá jafnréttislögum um jafna meðferð karla og kvenna.

Frétt af mbl.is

„Fólk er bara í áfalli“

„Það er tiltekið í lögunum að atvinnurekendur skuli gera nauðsynlegar ráðstafanir til að gera konum og körlum kleift að samræma starfsskyldur sínar og ábyrgð gagnvart fjölskyldum. Ráðstafanirnar skuli miða að því að auka sveigjanleika á skipulagningu vinnu og vinnutíma, þannig að það sé tekið tillit til fjölskylduaðstæðna starfsmanna,“ greinir hún frá.

Þungt hljóðið í flugfreyjum

Berglind segir að Flugfreyjufélagið hafi ekkert heyrt frá Icelandair þrátt fyrir ítrekaðar tilraunir til að fá flugfélagið til að draga ákvörðunina til baka. „Það er enn þá þungt hljóð í okkar fólki. Því er brugðið og líka hvernig var staðið að þessum aðgerðum.“

Frétt af mbl.is

Alltaf óheppilegt að valda óánægju

Hún kveðst ekki hafa heyrt af neinum uppsögnum á meðal flugfreyja og flugþjóna. „Ég hef ekki sóst eftir þeim upplýsingum sérstaklega en það standa allir í þeirri von að félagið muni draga þessa ákvörðun til baka. Í það minnsta að það fari í mildari aðgerðir og virði þessi sjónarmið sem eru uppi í landinu um sveigjanlegan vinnutíma og styttri vinnuviku. Ég held að fólk sé enn þá að halda í þá trú,“ bætir Berglind við.

Flugvél Icelandair. mbl.is/Eggert

Ályktunin í heild sinni:

„Á fjölmennum félagsfundi Flugfreyjufélags Íslands með félagsmönnum sem starfa hjá Icelandair var einróma samþykkt eftirfarandi ályktun: 

Við fordæmum ákvörðun Icelandair um að segja upp flugfreyjum og flugþjónum í hlutastörfum. 

Um er að ræða alvarlegt brot á kjarasamningsbundnum réttindum, sem verða ekki tekin af með einhliða þvingunaraðgerðum. Aðgerðir þessar ganga þvert á þá umræðu í samfélaginu, bæði af hálfu atvinnurekanda og launþegahreyfingarinnar um styttingu vinnuviku og sveigjanlegan vinnutíma.  

Félagsfundur skorar á Icelandair að ganga til viðræðna við FFÍ vegna aðhaldsaðgerða með vísan í bréf sem stjórn Flugfreyjufélags Íslands sendi forsvarsmönnum Icelandair þann 12. september sl. 

Flugfreyjur og flugþjónar skora á Icelandair að draga þessa ákvörðun sína til baka.“

• Blogga um frétt