Telur að lögbannskröfu verði hafnað
Setja bókamerki
„Ég tel ljóst að henni verði hafnað,“ segir Vilhjálmur H. Vilhjálmsson, lögmaður tekna.is, við fyrirspurn mbl.is vegna lögbannskröfu á hendur vefsíðunni tekjur.is. Sýslumaðurinn á höfuðborgarsvæðinu sagði að ákvörðun um lögbann yrði ekki tekin í dag.
Ingvar Smári Birgisson, lögfræðingur og formaður Sambands ungra sjálfstæðismanna, krafðist í gær lögbanns á tekjur.is. Á vefnum er hægt er að fletta upp tekjum og skattaupplýsingum allra Íslendinga 18 ára og eldri, gegn greiðslu áskriftargjalds, en Viskubrunnur ehf. er rekstraraðili síðunnar.
Vilhjálmur segir að lagaheimildin fyrir birtingunni sé afdráttarlaus og fordæmin fyrir birtingu sambærilegra upplýsinga mörg og aldrei hafi verið sett lögbann á þau. Hann tekur dæmi af útgáfu Tekjublaðs Frjálsrar verslunar en Persónuvernd vísaði kvörtun vegna þess frá síðasta föstudag.
„Umbjóðandi minn stendur traustum fótum lagalega séð,“ segir Vilhjálmur.
Ekki er hægt að fá upplýsingar um hversu margir hafa keypt aðgang að tekjur.is. Fyrsti mánuðurinn kostar 2.790 krónur og mánaðargjaldið eftir það er 790 krónur.
Vilhjálmur segir að umbjóðandi hans stefni að því að uppfæra gögnin þegar ný skattskrá verði gefin út. Það ráðist þó væntanlega af viðbrögðum og hvort takist að standa undir kostnaði vefsíðunnar.
Baldur: „Ég ætla að svara þessu kalli“
„Þetta náttúrulega endar með ósköpum“
„Þetta er pínu óvanaleg staða“
Segir nýtt frumvarp gefa eldisfyrirtækjum auðlindir
„Mér finnst Halla Hrund svona Vigdísarleg“
Átta morðmál á aðeins tólf mánuðum