Báðir vinningshafar sem skiptu með sér fjórföldum lottópotti um helgina hafa gefið sig fram við Íslenska getspá. Fékk hvor vinningshafi um 19,3 milljónir í sinn hlut. Annar miðinn var keyptur í Olís við Ánanaust í Reykjavík en hinn er í áskrift.
Í tilkynningu frá Íslenskri getspá kemur fram að eigandi annars miðans hafi verið fjölskyldufaðir á höfuðborgarsvæðinu með ung börn. Hann hafi verið sannfærður um að einhver vina sinna væri að gera at í sér þegar haft var samband við hann. Ætlaði hann að segja konu sinni frá vinningnum um kvöldið, kannski setja kampavín í kæli og skála fyrir breyttum fjárhag fjölskyldunnar.
Hjón á besta aldri á höfuðborgarsvæðinu voru eigendur hins miðans. Sögðust þau ekki ætla að sitja ein að milljónunum heldur láta gott af sér leiða til samfélagsins.