Tvö herskip fengu á sig brotsjó og sneru við

Tvö bandarísk herskip sem voru á leið til Noregs eftir heræfingu NATÓ hér á landi sneru við og héldu til hafnar á ný vegna slæms veðurs. Fengu þau á sig brotsjó og þarf annað skipanna að koma inn til viðgerða. Þetta staðfestir Sveinn H. Guðmarsson, upplýsingafulltrúi utanríkisráðuneytisins, í samtali við mbl.is.

Annað skipanna er komið að Skarfabakka, en hitt skipið er rétt fyrir utan Reykjavík.

Samkvæmt upplýsingum mbl.is slösuðust einhverjir skipverja á öðru skipinu þegar það fékk á sig brotsjóinn, en Sveinn gat ekki staðfest það. Hann segir ljóst að vont hafi verið í sjóinn undanfarið og það hafi verið aðalástæða þess að skipin sneru við, en þau lögðu af stað í gær frá landi.

Herskipin sem um ræðir eru annars vegar USS New York og hins vegar USS Gunston Hall.

Fjölmörg herskip komu til landsins vegna heræfingarinnar, meðal annars USS Iwo Jima. mbl.is/​Hari

• Blogga um frétt