Ljóst er að sjór hefur komist í vélar- og lestarrúm flutningaskipsins Fjordvik sem situr fast við hafnargarðinn í Helguvík. Leiða má líkur að því að gat sé á skrokki skipsins, en ekki er vitað hvar gatið er eða hversu stórt það er.
Kjartan Már Kjartansson, bæjarstjóri Reykjanesbæjar, segir ekki hægt að kanna gatið að svo stöddu. Þá staðfestir hann jafnframt að dæling á eldsneyti úr skipinu hefjist fljótlega.
Að sögn Ásgeirs Erlendssonar, upplýsingafulltrúa Landhelgisgæslunnar, er varðskipið Týr farið að sinna hefðbundnu eftirliti og er því farið af vettvangi. Varðskipið Þór er enn á svæðinu og verður þar áfram af öryggisástæðum.