Kærir gæsluvarðhald til Landsréttar
Setja bókamerki
Konan sem handtekin var í tengslum við bruna í einbýlishúsi við Kirkjuveg 18 á Selfossi síðastliðinn miðvikudag, og úrskurðuð í vikulangt gæsluvarðhald, hefur kært úrskurðinn til Landsréttar. Þetta kemur fram í tilkynningu frá lögreglunni á Suðurlandi.
Konan var gestkomandi í húsinu skömmu áður, eða þegar eldurinn kom upp. Karlmaður, sem var húsráðandi, var einnig handtekinn og jafnframt úrskurðaður í vikulangt varðhald. Fólkið var úrskurðað í gæsluvarðhald á grundvelli rannsóknarhagsmuna og hefur sætt einangrun. Bæði voru þau handtekin á vettvangi.
Fólkið var ekki yfirheyrt um helgina, en fram kemur í tilkynningu lögreglu að áfram sé unnið að rannsókn málsins. Meðal annars sé unnið úr gögnum sem aflað hefur verið með samtölum við möguleg vitni. Þá hafa skýrslutökur af sakborningum verið undirbúnar og unnið úr rannsóknargögnum á vettvangi. Vinna fer fram hjá lögreglu, tæknideild lögreglu höfuðborgarsvæðisins, Mannvirkjastofnun og fleiri aðilum eftir því sem við á.
Lögregla segir rannsóknina á viðkvæmu stigi og því sé ekki hægt að gefa frekari upplýsingar um hana að svo stöddu.
Greint frá frá því fyrir helgi að lögregla telji sig hafa rökstuddan grun um að eldurinn hafi kviknað af mannavöldum. Tvennt lést í brunanum, karl og kona á fimmtugsaldri.
Tilkynning um eldinn barst rétt fyrir klukkan fjögur í miðvikudag og þegar slökkvilið kom á vettvang var húsið alelda. Pétur Pétursson, slökkviliðsstjóri hjá Brunavörnum Árnessýslu, lýsti því þannig í samtali við mbl.is að húsið hefði verið einn eldhnöttur, eldur og reykur út um alla glugga.
Strax vaknaði grunur var um að fólk gæti verið inni í húsinu og fór slökkvilið því varlega í grófar aðgerðir á vettvangi. Slökkvistarf fór fram með tilliti til rannsóknarhagsmuna, þar sem fljótlega varð ljóst að mannslát hefði orðið.
Í samtali við mbl.is fyrir helgi vildi Oddur Árnason, yfirlögregluþjónn hjá lögreglunni á Suðurlandi, ekki segja til um það hvort grunur væri um íkveikju, en hann sagði að allar kenningar yrðu kannaðar. Lögregla færi „inn í þetta sem opið mál.“
Telur forsendur fyrir vaxtalækkun
Krefjast stöðvunar framkvæmda
Skar höfuðleðrið af íslenskri konu
Sex hafa greinst með listeríu
Handteknir eftir myndatöku í Vesturbæjarlaug
Árshátíð ríkislögreglustjóra haldin í Tékklandi
Veiting hvalveiðileyfis ekki brot á EES-samningi