Síminn hefur staðfest að Síminn og enska úrvalsdeildin hafa náð samningum um sýningarréttinn frá ensku úrvalsdeildinni í knattspyrnu frá og með tímabilinu 2019/2020. Gildir sýningarrétturinn út þrjú leiktímabil.
„Við erum afskaplega stolt að hafa náð þessu frábæra sjónvarpsefni til Símans. Enska úrvalsdeildin er eitt vinsælasta sjónvarpsefni landsins og við erum spennt að kynna nýjungar til leiks sem ekki hafa verið í boði áður eins og t.d. 4K útsendingar. Það ætti einnig að gleðja aðdáendur enskrar knattspyrnu að við munum sýna um 15% fleiri leiki í beinni útsendingu en er gert í dag,“ er haft eftir Orra Haukssyni, forstjóra Símans.
Áður hafði verið greint frá því að Stöð 2 Sport myndi missa enska boltann.
„Við settum fram afar myndarlegt tilboð sem var veruleg hækkun frá því sem við greiðum fyrir enska boltann í dag. Niðurstaðan var hins vegar að ofurtilboð barst úr annarri átt sem engin glóra væri í að jafna,“ sagði Björn Víglundsson, framkvæmdastjóri hjá Sýn, við Morgunblaðið í byrjun mánaðar.