Fulltrúar ríkisstjórnarinnar, heildarsamtaka á vinnumarkaði, forsvarsmanna Sambands íslenskra sveitarfélaga og ríkissáttasemjara funduðu í ellefta sinn í Ráðherrabústaðnum í gær.
Fundurinn var sá fyrsti eftir að nýjar stjórnir voru kjörnar í ASÍ, BSRB og Sambandi íslenskra sveitarfélaga.
Ákveðið var að halda áfram samstarfi um söfnun upplýsinga um launaþróun, þróun ráðstöfunartekna, skattbyrði og bótagreiðslur. Markmiðið er að greina tekjugrunn samfélagsins. Þá voru húsnæðismál einnig til umræðu og ákveðið að skeggræða þau málefni enn frekar á næsta fundi.