Borgaraþjónusta utanríkisráðuneytisins hefur átt í samskiptum við báða mennina sem eru í haldi lögreglunnar í Ástralíu vegna gruns um fíkniefnasmygl. Þetta staðfestir Sveinn H. Guðmarsson, upplýsingafulltrúi ráðuneytisins, í samtali við mbl.is. Starfsmenn borgaraþjónustunnar hafa átt í samskiptum við mennina og fjölskyldur þeirra.
„Þetta er hefðbundin borgaraþjónusta og aðstoð við Íslendinga í vanda erlendis,“ segir Sveinn og bætir við að mönnunum stendur aðstoðin til boða eins lengi og þurfa þykir. Hann gat hins vegar ekki staðfest hvort aðstoðin felst í að útvega lögmenn, en það er meðal þjónustu sem borgaraþjónustan getur veitt í tilfellum þar sem Íslendingar eru handteknir eða fangelsaðir erlendir.
Mennirnir voru handteknir á mánudag og fram kemur í tilkynningu á vefsíðu áströlsku alríkislögreglunnar að mennirnir eru 25 ára og 30 ára. Sá yngri var handtekinn á flugvellinum í Melbourne eftir að fjögur kíló af kókaíni fundust í farangri hans. Rannsókn leiddi lögreglu svo á slóðir hins eldri sem var handtekinn á hótelherbergi. Þar hafði lögreglan fundið 2,7 kíló af kókaíni.
Sá yngri hefur verið úrskurðaður í gæsluvarðhald til 13. febrúar og gæti hann átt yfir höfði sér lífstíðarfangelsi. Sá eldri var leiddur fyrir dómara í gær en gæsluvarðhaldsúrskurður yfir honum hefur ekki fengist staðfestur.
Greint hefur verið frá handtökunum á Facebook-síðu áströlsku alríkislögreglunnar og þar er tilkynningin öllu frjálslegri en á vefsíðu embættisins. „Veturinn nálgast (e. Winter is coming) fyrir tvo íslenska ríkisborgara,“ segir í upphafi færslunnar og er það verið að vísa í sjónvarpsþættina Game of Thrones, sem hafa að hluta til verið teknir upp á Íslandi.
Þá segist lögreglan aðeins vilja sjá snjó í Game of Thrones. Tilvísunin er margþætt, hin augljósasta er að orðið snjór hefur verið notað yfir kókaín á ensku en Snow er einnig eftirnafn einnar af aðalpersónum þáttanna, auk þess sem söguhetjurnar þurfa oft að fást við hin ýmsu verkefni þegar allt er á kafi í snjó.