Mikil umferð er um Grábrókarsvæðið, en ár er nú liðið síðan teljari var settur upp við Grábrók. Alls gengu 75.185 gestir á Grábrók samkvæmt teljaranum á tímabilinu frá 6. nóvember 2017 til 6. nóvember 2018 og svæðið því vinsæll viðkomustaður meðal ferðamanna, að því er fram kemur í frétt á vef Umhverfisstofnunar.
Haft er eftir Jóni Björnssyni hjá Umhverfisstofnun að aldrei áður hafi talning með rafrænum hætti verið framkvæmd við Grábrók. Greinilega sé hins vegar mikil umferð á svæðinu, en niðurstaðan sé þó í takt við hans tilfinningu áður en mælingar hófust.
Ýmsar upplýsingar um náttúrufyrirbærið er að finna á vef Umhverfisstofnunar. Þar segir m.a. að Grábrókargígar hafi fyrst verið friðlýstir sem náttúruvætti árið 1962.
Gígarnir séu alls þrír. Litla-Grábrók hafi þó að mestu horfið við framkvæmdir en Stóra-Grábrók rísi fagurformuð fast við þjóðveginn. Þriðji gígurinn er vestar og heitir Grábrókarfell og tilheyra gígarnir eldstöðvakerfi sem teygir sig langt vestur á Snæfellsnes.