Kynnti drög að stefnu um þjóðlendur

Katrín Jakobsdóttir forsætisráðherra kynnti drög að stefnu um samþykki fyrir nýtingu lands og landsréttinda í þjóðlendum á ríkisstjórnarfundi í morgun. Frestur til þess að skila inn umsögnum um drögin, sem birt hafa verið í samráðsgátt Stjórnarráðsins, er til 30. nóvember.

„Stefnumótunin tekur mið af meginsjónarmiðum sem fram koma í annarri opinberri stefnumörkun sem fyrir liggur á þessu sviði, svo sem landskipulagsstefnu, stjórnunar- og verndaráætlun Vatnajökulsþjóðgarðs og þingsályktun um stefnumarkandi landsáætlun um uppbyggingu innviða til verndar náttúru og menningarsögulegum minjum. Einnig er horft til markmiða um umhverfisvernd og nýtingu lands og auðlinda í löggjöf á sviði umhverfisréttar,“ segir í fréttatilkynningu um málið frá forsætisráðuneytinu.

Þar segir ennfremur að nú séu um 217 þjóðlendur á landinu og þekji um 86 hundraðshluta miðhálendisins og 44 hundraðshluta landsins alls sé miðað við þau landsvæði sem óbyggðanefnd hafi tekið til meðferðar og úrskurðað um. 

• Blogga um frétt