Sigmundur Davíð Gunnlaugsson, formaður Miðflokksins, og Brynjar Níelsson, þingmaður Sjálfstæðisflokks og formaður stjórnskipunar- og eftirlitsnefndar Alþingis, verða gestir Bjartar Ólafsdóttur í þjóðmálaþættinum Þingvöllum á K100 í dag, en þátturinn hefst kl. 10.
Fyrst ræðir Björt við Sigmund Davíð á nokkuð persónulegum nótum um það sem á daga hans hefur drifið í pólitíkinni frá því að hann sagði skilið við félaga sína í Framsóknarflokki og kom fram á sjónarsviðið með Miðflokkinn í fyrra.
Upp á síðkastið hafa farið nokkuð hörð skot á milli Sigmundar Davíðs og framsóknarfólks, eftir að formaðurinn fyrrverandi gagnrýndi flokkinn og ríkisstjórnina á miðstjórnarfundi Miðflokksins. Það mun eflaust bera á góma í spjalli þeirra Sigmundar og Bjartar.
Í síðari helmingi þáttarins bætist Brynjar Níelsson svo í hópinn. Þau Björt, Sigmundur Davíð og Brynjar munu ræða þriðja orkupakka Evrópusambandsins, sem hefur verið mikið í umræðunni undanfarnar vikur.
Hér má hlusta á K100 í beinni útsendingu