Reynir Hjálmarsson bar sigur úr býtum á Íslandsmótinu í skrafli sem fór fram í sjötta sinn um helgina. Gísli Ásgeirsson varð í öðru sæti og Hildur Lilliendahl Viggósdóttir í því þriðja.
Hildur Ýr Ísberg átti hæstu lögnina þegar hún nífaldaði orðið landkóng og hlaut fyrir það 230 stig. Lögnin var vefengd en hlaut náð fyrir augum dómarans Katrínar Axelsdóttur, að því er kemur fram í tilkynningu.
Spilaðar voru tíu umferðir með klukku, fimm á laugardag og fimm á sunnudag.
Skrafl hefur notið sívaxandi vinsælda undanfarin ár og nú skrafla þúsundir Íslendinga reglulega, á netinu eða með hefðbundnu skraflborði og stafatöflum.