Dagskráin hjá Margréti Þórhildi Danadrottningu vegna 100 ára fullveldisafmælis Íslands 1. desember næstkomandi er þétt. Enn er hægt að tryggja sér miða á sinfóníska sagnaskemmtun í Hörpu, þar sem drottningin mun flytja stutt ávarp í upphafi sýningar.
Í samtali við mbl.is segir Kolbrún Halldórsdóttir að þjóðinni sé boðið á þessa margslungnu sýningu um Íslendingasögurnar í Hörpu að kvöldi 1. desember, en að fólk þurfi að hafa hraðar hendur.
Verið er að leggja lokahönd á dagskrá drottningarinnar, en hún kemur til með að heimsækja Hörpu fyrri hluta dags og borða hádegisverð á Kolabrautinni. Margrét Þórhildur verður viðstödd setningu hátíðarinnar við Stjórnarráðið og verður aftur í Hörpu um kvöldið til að vera viðstödd sýninguna og flytja ávarp. Þess á milli verður hún í Veröld – húsi Vigdísar.
Hægt er að tryggja sér miða á sinfónísku sagnaskemmtunina á vef Hörpu, en aðgangur er ókeypis.