„Ég skrifa þessa grein vegna þess að ég og fjölskylda mín viljum að mál Áslaugar Perlu Kristjónsdóttur, sem lést eftir að henni var hrint yfir handrið á svölum á 10. hæð fjölbýlishúss við Engihjalla árið 2000, verði endurupptekið.“
Þannig hefst aðsend grein Gerðar Berndsen í Morgunblaðinu í dag. Hæstiréttur dæmdi Ásgeir Inga Ásgeirsson í 16 ára fangelsi 2001 fyrir að hafa hrint Áslaugu fram af svölum á 10. hæð fjölbýlishúss í Engihjalla í maí árið 2000. Hann var dæmdur í 14 ára fangelsi í Héraðsdómi Reykjavíkur en Hæstiréttur þyngdi dóminn.
„Ég sótti um endurupptöku á málinu 2006 hjá ríkissaksóknara með aðstoð dómsmálaráðherra, fékk neitun. Aftur 2009 vegna nauðgunar sem var órannsökuð, fékk líka neitun þá. Ég sendi beiðni til endurupptökunefndar 2015 og fékk neitun. Sendi aftur beiðni 2017, þá lét ég fylgja með 75 síður úr lögregluskýrslum, sem sönnunargögn, en fékk aftur neitun,“ skrifar Gerður.
Hún bendir á að í lögum um meðferð sakamála sé fjallað um endurupptöku dæmdra mála í Hæstarétti. Þar standi að ef verulegar líkur séu leiddar að því að sönnunargögn sem færð hafi verið fram í máli hafi verið rangt metin, svo að áhrif hafi haft á niðurstöðu þess, þá geti Hæstiréttur orðið við beiðni manns, sem telji sig ranglega sakfelldan eða sakfelldan fyrir mun meira brot en það sem hefur verið framið.
„Það er eingöngu hægt að taka upp mál til endurupptöku ef sakamaður á í hlut. Ef lögunum verður breytt er hægt að taka upp mál dóttur minnar,“ skrifar Gerður.