Lokað um Kjalarnes, Öræfi og Öxi
Anna Sigríður Einarsdóttir
Setja bókamerki
Búið er að loka á umferð um Kjalarnes, Öræfi, Öxi, Fjarðarheiði, Nesjavallaleið, Vestfjarðaleið um Dynjandisheiði og Hrafnseyrarheiði og Bíldudalsveg að því er fram kemur á vef Vegagerðarinnar.
Davíð Már Bjarnason, upplýsingafulltrúi Landsbjargar, segir björgunarsveitir alls staðar á landinu vera með viðbúnað í gangi en afar slæmu veðri er spáð fram á aðfaranótt föstudags.
„Björgunarsveitir eru frekar meðvitaðar um þessa spá, enda er hún svolítið afgerandi,“ segir Davíð Már í samtali við mbl.is. Björgunarsveitir hafa mannað lokunarpósta við Jökulsárlón og Lómagnúp frá því sex síðdegis og til stendur að björgunarsveitir manni vegalokun á nokkrum stöðum til viðbótar.
Davíð Már segir hins vegar ekki hafa komið til þess enn að björgunarsveitir hafi þurft að sinna útköllum.
„Fyrsta alvöruveðrið“
Veðurstofan hefur gefið út gula viðvörun fyrir stóran hluta landsins og hefur Landsbjörg sett í gang sinn mesta viðbúnað vegna ferðafólks, en nokkur þúsund erlendir ferðamenn eru á landinu. Segir Davíð Már það vera ástæðu þess að viðvörun Safe Travel sé á hæsta stigi, sem ekki sé algengt.
„Þetta er fyrsta alvöruveðrið, þannig að það gæti komið einhverjum að óvörum,“ segir hann. „Þetta efsta stig þýðir að menn leggja sig allan fram um að koma skilaboðunum áleiðis.“
Aðvörun hefur því verið sett inn á Safe Travel-vefinn og staðbundin SMS-skilaboð hafa verið send út. Þá er aðvörun einnig að finna á um 100 upplýsingaskjám sem finna má á fjölförnum ferðamannastöðum hringinn í kringum landið og eins hafa ferðaþjónustuaðilar verið beðnir um að hengja upp aðvaranir og upplýsa gesti sína um stöðuna.
„Markmiðið er að allir séu vel upplýstir og vonandi dugar það svo það reyni ekki á að kalla þurfi út björgunarsveitir í kvöld og á morgun,“ segir Davíð Már.
Vegagerðin gerir ráð fyrir að þjóðvegur eitt verði lokaður frá klukkan tíu í kvöld til ellefu á morgun frá Hvolsvelli að Kirkjubæjarklaustri, en lokað verður frá klukkan sex milli Kirkjubæjarklausturs og Jökulsárlóns.
Vegur um Mývatns- og Möðrudalsöræfi verður opinn fram á kvöld, en ekki er ljóst hver staðan verður á morgun. Leiðin verður líklega ófær eftir að þjónustutíma lýkur klukkan hálfátta ef spár ganga eftir að sögn Vegagerðarinnar.
Búist er við því að vegurinn um Öxnadalsheiði verður lokaður strax í fyrramálið. Einnig er gert ráð fyrir að til lokana komi í Hófaskarði á morgun.
Spursmál: Fyrsta stóra viðtal Katrínar
29 nautgripir fundust dauðir
Segjast ekki vera á kaldri slóð
Mun fara sparlega með málskotsréttinn
Aðkoman í gripahúsið mjög slæm
Mikilvægt að vera á tánum
Hyggjast leyfa fólki að skoða gosið