Starf björgunarsveita hefur gengið vel í vetrarveðrinu sem geisað hefur á landinu frá í gær og segir upplýsingafulltrúi Landsbjargar ánægjulegt að fólk virðist hafa tekið mark á viðvörunum.
„Þetta hefur ekki verið nein holskefla af verkefnum sem hafa komið á borð björgunarsveitanna í dag. Mest hefur álagið verið fyrir norðan, og það eru þá helst ófærðartengd verkefni. Bílar sátu fastir í þéttbýlum í morgun og svo hafa ökumenn lent í vandræðum, svo sem á Öxnadalsheiði,“ segir Davíð Már Bjarnason.
Björgunarsveitir voru kallaðar til upp úr hádegi vegna sautján manna rútu sem hafði misst kerru og sat föst í ófærð í Fnjóskadal.
„Menn eru ekkert að sligast undan álagi, en það hafa vissulega verið þó nokkur verkefni fyrir björgunarsveitir á Norðurlandi,“ segir Davíð Már, en að í veðri sem þessu hafi oft verið meira um verkefni.
„Við verðum bara að lesa í það að líklega hafa þó nokkuð margir tekið mark á þessum viðvörunum sem hafa ómað síðustu daga. Þá hafa fáir, ef einhverjir ferðamenn, lent í vandræðum að okkur vitandi. Það er jákvætt að þetta sé að komast til skila.“
„Þótt þetta sé fyrsta alvöruvetrarveðrið þennan veturinn virðist það ekki hafa komið mjög flatt upp á fólk,“ segir Davíð Már. Björgunarsveitarmenn munu standa vaktina áfram, en á Norðurlandi er ekki gert ráð fyrir því að veðrið gangi niður fyrr en á morgun.
„Björgunarsveitarfólk hefur mannað lokunarpósta frá kl. 18 í gær. Það eru allir meðvitaðir um það að veðrið er ekki alveg gengið yfir. Það er enn vont veður fyrir norðan, hríð, lítið skyggni og ekkert ferðaveður.“