Sitja fastir í flugvélum vegna veðurs

Fólk situr fast í flugvélum í Keflavík.
Fólk situr fast í flugvélum í Keflavík. mbl.is/Eggert

Farþegar sitja fastir í sex flugvélum á Keflavíkurflugvelli en ekki er hægt að hleypa þeim inn í flugstöðvarbygginguna vegna ofsaveðurs. Auk þess situr áhöfn föst í sjöundu vélinni.

Guðjón Helgason, upplýsingafulltrúi Isavia, segir í samtali við mbl.is að undir kvöld hafi allar landgöngubrýr verið teknar úr notkun. Það sé gert þegar vindhraði fer yfir 25 m/s. 

Þjónustufyrirtæki sem eru með stigabíla á flugvellinum hafa auk þess tekið þá úr notkun.

Guðjón segir að hægt sé að lenda á flugvellinum en bendir á að á vefsíðu Isavia sé viðvörun um að flug gæti raskast vegna veðurs. 

Guðjón segir að farþegum verði hleypt frá borði þegar vind lægi en samkvæmt vefsíðu Veðurstofunnar mun lægja á næsta klukkutímanum.

Vegna þessa eru töluverðar seinkanir á flugi frá Keflavíkurflugvelli í kvöld. 

mbl.is
Fleira áhugavert
Fleira áhugavert