„Ég held að það sé þrír metrar,“ segir Hrólfur Karl Cela, þegar blaðamaður forvitnast um stærðina á risastóru jólatré sem hann er nýbúinn að kaupa hjá Flugbjörgunarsveitinni við Öskjuhlíð í dag.
Hrólfur gat ekki lokað skottinu á bílnum sem hann kom á en segist full viss um að hann komi trénu fyrir heima hjá sér.
„Ég er búinn að horfa á Griswold-fjölskylduna í Christmas Vacation á hverju ári frá því að ég var pínulítill þannig að maður þarf að fara í metnaðinn eins og Clark,“ segir Hrólfur en eins og mörgum er kunnugt um sagaði Clark Griswold fullstórt jólatré í jólamyndinni frægu.
Hjalti Björnsson, formaður Flugbjörgunarsveitarinnar í Reykjavík, segir að það sé töluvert meiri sala á jólatrjám Flugbjörgunarsveitarinnar í ár heldur en á síðasta ári.
„Það eru síðustu forvörð að kaupa jólatré,“ segir Hjalti og hefur lög að mæla; það styttist óðum í jólin. Hann segir björgunarsveitarfólk þakklátt viðskiptavinum en sala jólatrjáa er gríðarlega mikilvæg fjáröflun.
Áður hafði komið fram að normannsþinur og íslensk fura að stærðinni 1,5 til 2 metrar eru vinsælustu tegundir jólatrjáa hjá Íslendingum samkvæmt óvísindalegri könnun mbl.is.