Tengist ekki veikindahrinunni 2016

Flugvél Icelandair á leið til Kaupmannahafnar var snúið við vegna …
Flugvél Icelandair á leið til Kaupmannahafnar var snúið við vegna veikinda flugfreyju síðastliðinn föstudag. mbl.is/Eggert

Veikindi sem upp komu í flugvél Icelandair á leið til Kaupmannahafnar á föstudag virðast ekki tengjast veikindum sem upp komu meðal fjölda starfsfólks flugfélagsins árið 2016. Þetta kemur fram í skriflegu svari frá Icelandair.

Flugvélinni var snúið við aftur til Keflavíkurflugvallar á föstudagsmorgun eftir að flugfreyja veiktist, en ákvörðunin var tekin í samráði við lækni sem var um borð. Flugfreyjan er á batavegi.

Í svari Icelandair við fyrirspurn mbl.is segir jafnframt að árið 2016 hafi verið um að ræða atvik sem fátt áttu sameiginlegt og dreifðust á mismunandi tegundir flugvéla Icelandair. Þá voru sjúkdómseinkenni ekki í öllum tilvikum þau sömu, en veikindi flugliða Icelandair voru rannsökuð af rannsóknarnefnd flugslysa.

Í fluginu í síðustu viku fundu tveir úr áhöfninni til viðbótar fyrir ónotum, en útlit er fyrir að það tengist ekki veikindum flugfreyjunnar. Ekki fengust upplýsingar um það hvers eðlis veikindin voru.

mbl.is