Spá 40-50 m/s í dag

Kort/Veðurstofa Íslands

Gul viðvörun tekur gildi víða á landinu í dag en spáð er suðvestanstormi eða -roki á norðanverðu landinu og vindhviður við fjöll gætu náð 40-50 m/s. Lægir á morgun. Íbúar á svæðunum er hvattir til að tryggja lausa hluti utandyra, sem gætu fokið og valdið tjóni. Veðurstofan biður vegfarendur um að fara varlega.

Gul viðvörun gildir á Vestfjörðum frá klukkan 12 á hádegi til klukkan 7 í fyrramálið. Þar er spáð suðvestan 15-23 m/s með vindhviðum að 35-40 m/s nærri Ísafirði, Bolungarvík og Hnífsdal og víða á fjallvegum. Ferðalangar fari varlega.

Á Norðurlandi vestra og Ströndum tekur gul viðvörun gildi klukkan 13 og gildir til 10 í fyrramálið. Þar er spáð s uðvestan 15-25 m/s með vindhviðum 35-45 m/s við fjöll, hvassast á Ströndum og í Skagafirði. Varhugavert ökutækjum sem taka á sig mikinn vind. Ferðalangar fari varlega.

Á Norðurlandi eystra tekur viðvörun gildi klukkan 13 og gildir til klukkan 11 á morgun. Suðvestan 15-25 m/s með vindhviðum 40-50 m/s við fjöll, hvassast á Tröllaskaga. Varhugavert ökutækjum sem taka á sig mikinn vind. Ferðalangar fari varlega.

Á Austurlandi að Glettingi tekur gul viðvörun gildi klukkan 18 og gildir til 11 í fyrramálið. Þar er spáð vestan 18-25 m/s, hvassast norðan til með vindhviðum að 45-50 m/s við Langanes, á Jökuldal og í Vopnafirði. Ferðalangar fari varlega.

Kort/Veðurstofa Íslands

Gæti nálgast 20 stiga hita

„Í dag hvessir jafnt og þétt og víða stormur og jafnvel rok á norðanverðu landinu. Þar gætu hviður náð vel yfir 40 m/s þar sem verst lætur. Mun hægari syðra og súld á köflum vestast á landinu. Vestlægari í nótt og lægir síðan og kólnar á morgun. Taka síðan við svalari umhleypingar en ekki eins hvass vindur.
Mjög hlýtt loft streymir nú yfir landinu og með svona hvössum vindi getur það slegið sér niður, einkum austast á landinu. Þó svo að hitatölur á borð við 10 til 15 stig verði líklega algengastar á því svæði þegar líður á daginn, gæti hlýnað talsvert meira ef allt gengur upp og við því séð hitatölur sem næðu upp undir 20 stig. En það skýrist ekki fyrr en í kvöld og jafnvel ekki fyrr en á morgun þegar veður lægir,“ segir í hugleiðingum veðurfræðings á Veðurstofu Íslands.

Veðurspá fyrir næstu daga

Suðvestan 18-25 m/s á norðanverðu landinu í dag, hvassast á Ströndum og Tröllaskaga, en mun hægari syðra. Rigning eða súld vestan til, en þurrt að kalla eystra. Styttir upp og kólnar á Vestfjörðum seint í kvöld. Hiti 5 til 14 stig, hlýjast á Austfjörðum.
Minnkandi vestanátt og kólnar á morgun, fyrst sunnan til, víða 5-13 undir kvöld, hvassast um landið N-vert. Þurrt að kalla og frystir um mestallt land, síst allra syðst.

Á fimmtudag:
Vestan 15-20 m/s við N-ströndina um morguninn, en lægir síðan smám saman og rofar til. Mun hægari vindur og rigning eða slydda með köflum SV-til, en styttir upp síðdegis. Frost víða 0 til 5 stig, en hiti 1 til 5 stig syðst.

Á föstudag:
Gengur í sunnan og suðaustan 8-15 m/s með slyddu eða rigningu, en lengst af þurrt fyrir austan. Hlýnar í veðri og hiti 2 til 7 stig síðdegis. Hægari, vestlægari og víða dálítil væta um kvöldið.

Á laugardag:
Breytileg átt yfirleitt 5-13 m/s. Þurrt að kalla árdegis og fremur svalt, snjókoma N-til, en slydda eða rigning syðra.

Á sunnudag:
Útlit fyrir norðanátt með éljum og kólnandi veður, en yfirleitt léttskýjað S- og V-lands. Úrkomuminna síðdegis og víða frost.

Á mánudag:
Gengur líklega í hvassa austanátt með úrkomu víða á landinu, einkum S- og V-lands. Áfram svalt veður, en hlánar sunnan til.

Á þriðjudag:
Útlit fyrir norðlæga átt með ofankomu um landið norðan- og austanvert en þurrt að kalla syðra. Vægt frost.

mbl.is