Myndi setja leikskólana í upplausn

„Helst hef ég áhyggjur af því að tapa fagfólki sem þegar er af skornum skammti, enda stundum erfitt að manna leikskólana. Það eru auðvitað alltaf átök þegar farið er í sameiningar, ekki bara fyrir starfsfólk heldur einnig börn og foreldra. Þetta myndi því setja báða leikskóla í hálfgerða upplausn.“

Þetta segir Berglind Hallgrímsdóttir, starfandi leikskólastjóri á Suðurborg í Breiðholti, um tillögu skóla- og frístundasviðs Reykjavíkurborgar um sameiningu tveggja leikskóla, Suðurborgar og Hólaborgar, í Suðurhólum í Breiðholti.

Er í tillögunni gert ráð fyrir að með sameiningu verði til nýr leikskóli 10 deilda með um 160 börn og með sérhæfðri ungbarnadeild. Í dag liggja lóðir skólanna saman og eru þær aðskildar með girðingu, en 43 metrar eru á milli Suðurborgar og Hólaborgar.

Aðspurð um mál þetta í Morgunblaðinu í dag segir Berglind „áhyggjuhljóð“ vera í starfsfólki á Suðurborg. „Það kvíðir þessum fyrirhuguðu breytingum og ég hef áhyggjur af því að missa starfsfólk. Það mun svo hafa áhrif heim til foreldra og auðvitað á starfið með börnunum,“ segir hún.