Rannsóknasjóður úthlutar 850 milljónum

Stjórn Rannsóknasjóðs hefur úthlutað nýjum styrkjum fyrir árið 2019 til 61 rannsóknaverkefnis, samtals um 850 milljónum króna, en sjóðurinn styrkir verkefni á öllum sviðum vísinda. Lista yfir úthlutunina má sjá á vef Rannís.

Sjóðnum bárust alls 359 umsóknir og er hlutfall úthlutunar í ár 17%, samkvæmt fréttatilkynningu frá Rannís, en  á hverju ári eru veittir um 2,5 milljarðar króna til sjóðsins, þar af fara um 1,7 milljarðar króna í framhaldsstyrki til eldri verkefna, en almennt eru styrkir sjóðsins til þriggja ára. Umsóknum fjölgar á milli ára og voru þær sem dæmi 291 árið 2016.

Sjóðurinn úthlutar styrkjum á öllum sviðum vísinda, allt frá styrkjum til doktorsnema til svokallaðra öndvegisstyrkja, sem veittir eru til stórra verkefna sem skara fram úr á sínu sviði og hafa alþjóðlega tengingu.

Þremur öndvegisstyrkjum var úthlutað að þessu sinni, en hver öndvegisstyrkur er um 150 milljónir króna til þriggja ára, en þá hlutu:

• Bjarni Kristófer Kristjánsson, Háskólanum á Hólum, til verkefnisins Samþætting vist-, þróunar- og þroskunarfræðilegra þátta til mótunar á líffræðilegri fjölbreytni: Hornsíli í Mývatni sem líkan.
• Egill Skúlason, Raunvísindastofnun, til verkefnisins Binding niturs við umhverfisaðstæður með kerfisbundinni hönnun á rafendahvötum.
• Jón Ólafsson, Háskóla Íslands, til verkefnisins Lýðræðisleg stjórnarskrárgerð: Tekist á um borgaraþátttöku, vald stofnana og sameiginleg gæði.

Um Rannsóknasjóð

Rannsóknasjóður er leiðandi samkeppnissjóður hér á landi. Hlutverk hans er að efla grunnrannsóknir í þágu vísinda og samfélags og mennta ungt fólk til vísindarannsókna með því að styðja framúrskarandi verkefni og frábæra vísindamenn. Sjö fagráð, auk ytri matsmanna, meta umsóknir í sjóðinn og er matsferlið hliðstætt því sem best þekkist meðal erlendra sjóða. Stjórn sjóðsins tekur endanlega ákvörðun um styrkveitingar.

Áhrifa Rannsóknasjóðs gætir víðs vegar. Þau má sjá í öflugum þekkingarfyrirtækjum sem byggja á vísindagrunni og öflugu starfi í þágu samfélags á sviðum eins og lýðheilsu, lífhagkerfi, nýtingu náttúruauðlinda og eftirliti með náttúruvá. Niðurstöður rannsókna styðja við hagvöxt og heilbrigt samfélag. Íslenskir vísindamenn standa framarlega í alþjóðlegu samhengi, þeir eru í miklu alþjóðlegu samstarfi, meðal annars í gegnum vísindasjóð Evrópusambandsins, og birta ritrýndar greinar til jafns við samanburðarlöndin.

• Blogga um frétt