Kynna randbyggð við Hringbraut í Vatnsmýri

Vísindagarðar Háskóla Íslands hafa kynnt nýjar lóðir við Hringbraut. Þær eru fyrir svonefnda randbyggð suður af Læknagarði og meðfram Hringbraut. Byggingarmagn verður allt að 15 þús. fermetrar, ásamt um 4 þúsund fermetra bílakjallara. HÍ á um 95% hlut í vísindagörðum en borgin 5%.

Með uppbyggingunni má segja að nýja Landspítalasvæðið stækki til suðurs. Hugmyndin er að innan randbyggðar verði annars vegar blanda af rannsóknar- eða nýsköpunarstarfsemi og hins vegar fyrirtæki með starfsemi sem þykir falla vel að spítalanum á einhvern hátt. Byggingarréttur á lóðunum er nú til sölu.

Hrólfur Jónsson, fv. skrifstofustjóri á skrifstofu eigna- og atvinnuþróunar hjá borginni, tók við stöðu framkvæmdastjóra Vísindagarða Háskóla Íslands í kjölfar þess að dr. Eiríkur Hilmarsson, fyrrverandi framkvæmdastjóri, lést í fyrra eftir veikindi.

Í umfjöllun um áform þessi í Morgunblaðinu í dag segir hann vonir bundnar við að niðurstaða útboðsins liggi fyrir í sumarbyrjun. Síðan geti vinna við deiliskipulagið tekið ár og frekari hönnun hálft ár. Samkvæmt því sé raunhæft að framkvæmdir geti mögulega hafist í lok árs 2020.