Á meðan sumir borgarbúa blótuðu veðrinu fögnuðu aðrir þegar loksins tók að snjóa í höfuðborginni í morgun. Víða um land gerði Vetur konungur vart við sig og ljóst er að teikn eru á lofti um að hann ætli að hefja vetursetu sína fljótlega.
Hæglætisveður verður á stórum hluta landsins á morgun ef spár Veðurstofu Íslands rætast en búast má við að á suðvesturhorninu fari hiti aftur yfir frostmark seint á mánudag með tilheyrandi úrkomu og slyddu.
Á miðvikudag er hins vegar útlit fyrir að hiti taki snögga dýfu því búist er við um fjórtán stiga frosti og sól á höfuðborgarsvæðinu á miðvikudag. Búast má við sextán stiga frosti á Akureyri og nítján stiga frosti á hálendinu á fimmtudag.
Spurður hvort skíðaáhugafólk geti nú farið að dusta rykið að klossunum og stöfunum sagði veðurfræðingur á Veðurstofu Íslands í samtali við mbl.is það ekki útilokað, enda mætti búast við því að þrátt fyrir að úrkoma á höfuðborgarsvæðinu yrði í formi rigningar, yrði hún líklega í formi snjókomu í Bláfjöllum.