„Það er búið að vitja allra netanna og það hefur enginn fiskur fundist. Það eru góðar fréttir,“ segir Kjartan Ólafsson, stjórnarformaður Arnarlax, en í gær var vitjað neta sem lögð voru til að kanna hvort lax hefði sloppið úr sjókví fyrirtækisins við Hringsdal í Arnarfirði. Fiskistofa stýrði aðgerðum í gær.

Gat kom á nótarpoka einnar sjókvíar og uppgötvaðist við skoðun kafara. Gert var við gatið á þriðjudag. Gatið var 15 cm á breidd og 50 cm á hæð og því þótti ekki óhugsandi að fiskur hefði komist úr kvínni. Í henni voru um 157 þúsund laxar að meðalþyngd 1,3 kg.

Kjartan sagði í samtali við Morgunblaðið síðdegis í gær að fyrirtækið hefði fylgt verkreglum þegar tilvik sem þetta kæmu upp. Í dag yrði áfram unnið að málinu með Matvælastofnun.

„Við sjáum ekki frávik í fóðri á lífmassa og höfum hvorki séð breytt atferli né líf utan kvíanna,“ segir Kjartan. „Við fyrstu sýn hafa þetta verið góðar fréttir.“

Tengdar fréttir

Fiskeldi

„Margt hefur nú ekki beinlínis verið til fyrirmyndar“

• Segir nýtt frumvarp gefa eldisfyrirtækjum auðlindir
• Laxey fær sex milljarða
• Fjárfestingin 115 milljarðar króna
• Bátur Arnarlax verður fyrsti sinnar tegundar

» Fleiri tengdar fréttir