Töluvert hefur verið um innbrot á Kársnesi í Kópavogi að undanförnu og hefur lögregla aukið eftirlit í hverfinu. Meintir innbrotsþjófar hafa leitað inn í hús, bíla og geymslur að nóttu til og um hábjartan dag, að því er fram kemur í frásögnum í Facebook-hópi hverfisins.
Heimir Ríkarðsson, lögreglufulltrúi hjá lögreglunni á höfuðborgarsvæðinu, staðfestir að innbrotahrina hafi orðið á svæðinu síðastliðnar vikur, en hann segir að ekki sé talið að um skipulagða glæpastarfsemi sé að ræða.
„Það hefur verið mikið um innbrot á þessu svæði að undanförnu, á öllum tímum sólarhrings. Lögreglan er með aukið eftirlit í bænum vegna þessa og keyrir um hverfið í merktum og ómerktum bílum,“ segir Heimir.
Heimir segir tjón hafa orðið vegna innbrotanna og að mál þessi séu í rannsókn.