Vindgerðar snjórúllur á Keili

Vallarstarfsmenn á golfvellinum Keili ráku upp stór augu í gærmorgun þegar við þeim blöstu tugir snjóbolta sem myndast höfðu af náttúrunnar hendi. Um er að ræða vindgerðar snjórúllur, sem eru öllu þekktari á slóðum Norður-Ameríku, en sjást þó stöku sinnum hér á landi.

Starfsmenn vallarins vöktu athygli á snjórúllunum á Facebook og færslunni hefur verið deilt í hópnum Hungurdiskar, þar sem veðuráhugamenn sameinast og fjalla um veður og veðurfar.

Einar Sveinbjörnsson veðurfræðingur tekur þátt í umræðunni og segir snjórúllurnar svokölluðu ekki óalgengar. „Til þarf snjó sem upphaflega var alveg þurr og er aðeins tekin[n] að blotna um leið og hiti kemst yfir frostmark. Síðan dálítinn blástur sem "sjálfhnoðar" í rúllur.“

Frekari fróðleik um snjórúllurnar má finna á vef Veðurstofunnar og þar segir meðal annars að stærstu rúllur af þessu tagi, sem getið er um í gögnum Veðurstofunnar, eru þær sem Guðmundur Kjartansson jarðfræðingur lýsir í pistli í tímaritinu Veðrinu (1957). Hann sá þær í Selskarði (nærri Næfurholti á Rangárvöllum) 5. febrúar 1956 eftir ofsaveður sem þá gerði.

Hér má lesa lýsingu Guðmundar á risavöxnu rúllunum sem og frekari fróðleik um snjórúllurnar svokölluðu.

Snjórúllur verða til þegar vindur nær til snævar sem upphaflega var alveg þurr en er aðeins tekinn að blotna um leið og hiti kemst yfir frostmark. Ljósmynd/Guðbjartur Ísak Ásgeirsson

• Blogga um frétt