Lítil grafa fór í gegnum ísinn á Rauðavatni á þriðja tímanum í dag. Engin slys urðu á fólki en nokkrir starfsmenn Reykjavíkurborgar unnu að gerð skautasvells þegar ísinn gaf sig undan gröfunni.
Grafan féll hálf ofan í vatnið og var kallað eftir traktor til að aðstoða við að ná gröfunni upp á ísinn.
Bjarni Brynjólfsson, upplýsingastjóri Reykjavíkurborgar, segir í samtali við mbl.is að starfsmenn borgarinnar hafi mælt ísinn áður en þeir fóru út á hann og gaf þykktin, 15 sentimetrar, til kynna að öruggt væri fyrir gröfuna að fara út á ísinn. Sú var hins vegar ekki raunin. Bjarni segir að starfsmanninum sem stýrði gröfunni hafi ekki orðið meint af.
Útlit er hins vegar fyrir að borgarbúar verði að bíða þar til vatnið frjósi á ný svo hægt verði að útbúa þar skautasvell. „Því miður er skautasvellið ónýtt og mun ekki opna á næstu dögum þannig að við þurfum að bíða þar til það frýs aftur,“ segir Bjarni.
Lögreglan á höfuðborgarsvæðinu og umferðardeild lögreglunnar hefur fengið tilkynningu um atvikið en ekki þótti þörf á aðstoð lögreglu við vatnið.
Fréttin hefur verið uppfærð.