Innlent | mbl | 31.1.2019 | 11:53 | Uppfært 13:39

Endurgreiðsla geti numið 25% af kostnaði

Lilja Alfreðsdóttir, mennta- og menningarmálaráðherra, á fundinum í dag. mbl.is/Hari

Drög að frumvarpi til laga um breytingar á fjölmiðlalögum, sem fela í sér heimildir til að veita styrki í formi endurgreiðslu á hluta ritstjórnarkostnaðar einkarekinna fjölmiðla, hafa verið kynnt. Hlutfall endurgreiðslu getur að hámarki orðið 25% af kostnaði, en þó ekki hærra en 50 milljónir til hvers umsækjanda.

Þetta kom fram á blaðamannafundi þar sem Lilja Alfreðsdóttir, mennta- og menningamálaráðherra, kynnti efni frumvarpsins.

Frétt af mbl.is

Stuðningur við fjölmiðla kynntur

Fram kom, að frumvarpið væri unnið á grundvelli stefnuyfirlýsingar ríkisstjórnar og fjármálaáætlunar 2019 – 2023 þar sem gerð var grein fyrir því að unnið yrði að því að bæta rekstrarumhverfi fjölmiðla á tímabilinu.

Meginefni frumvarpsins er að veita stjórnvöldum heimild til að styðja við rekstur einkarekinna fjölmiðla í formi endurgreiðslu á allt að 25% af tilteknum hluta ritstjórnarkostnaðar. mbl.is

Meginefni frumvarpsins:

Styrkir til fjölmiðla í formi endurgreiðslu á allt að 25% af tilteknum hluta ritstjórnarkostnaðar.
Skilyrði um að viðtakendur styrkja uppfylli ýmis skilyrði fjölmiðlalaga, efni þeirra sé fjölbreytt og fyrir allan almenning og byggist á fréttum, fréttatengdu efni og samfélagsumræðu í víðum skilningi.
Þak á hámarksfjárhæð styrkja og heimild til að veita staðbundnum miðlum álag.

Vilja tryggja lýðræðislega umræðu

Fram kemur, að meginmarkmiðið með aðgerðum stjórnvalda sé að tryggja lýðræðislega umræðu og samræður í samfélaginu um málefni þess séu gerðar kröfur um að fjölmiðlarnir uppfylli tiltekin skilyrði til að geta hlotið styrk eða endurgreiðslu á hluta kostnaðar við öflun og miðlun frétta, fréttatengt efni og umfjöllun um samfélagsleg málefni.

Helstu skilyrði eru:

Fjölmiðill skal vera skráður eða hafa leyfi til hljóð- eða myndmiðlunar
Fjölmiðill hafi starfað óslitið í tólf mánuði eða lengur fyrir þann tíma er umsókn berst til fjölmiðlanefndar.
Aðalmarkmið fjölmiðils skal vera miðlun frétta, fréttatengds efnis og umfjöllun um samfélagsleg málefni.
Efni fjölmiðilsins skal vera fjölbreytt og fyrir allan almenning á Íslandi.
Prentmiðlar skulu koma út að lágmarki fjörutíu og átta sinnum á ári. Netmiðlar, hljóð- og myndmiðlar og aðrir sambærilegir miðlar skulu miðla nýju efni daglega.
Ritstjórnarefni skal að lágmarki vera 40% af því efni sem birtist í prentmiðlum sem dreift er endurgjaldslaust til lesenda. Ritstjórnarefni í öðrum prentmiðlum og hjá netmiðlum skal að lágmarki vera helmingur af birtu efni.
Einn sjötti hluti ritstjórnarefnis skal byggja á sjálfstæðri frétta- eða heimildaöflun.

Í skýrslu nefndar um rekstrarumhverfi einkarekinna fjölmiðla hér á landi, sem skipuð var í lok árs 2016 kemur fram að rekstur einkarekinna fjölmiðla sé svo erfiður að það gefi stjórnvöldum tilefni til að stuðla að bættu rekstrarumhverfi þeirra. mbl.is/Golli

Þá kemur fram, að gert sé ráð fyrir endurgreiðsluhæfur kostnaður verði bundinn við beinan launakostnað blaða- og fréttamanna, ritstjóra og aðstoðarritstjóra, myndatökumanna, ljósmyndara og prófarkalesara auk verktakagreiðslna fyrir sömu störf.

Endurgreiðslan geti ekki verið hærri en 50 milljónir

Hlutfall endurgreiðslu verði að hámarki vera 25% af kostnaði við framngreint, þó ekki hærra en 50 milljónir kr. til hvers umsækjanda vegna síðastliðins árs. Þá sé reglugerðarheimild sem kveður m.a. á um heimild til að veita staðbundnum fjölmiðlum viðbótarendurgreiðslu.

Gert er ráð fyrir að fjölmiðlanefnd sjái um framkvæmd og að kostnaður við hana verði tekinn af árlegum fjárveitingum til verkefnisins. Lagt er til að lögin taki gildi 1. janúar 2020 og endurgreiðslur miðist við síðastliðið ár. Lögin verði endurskoðuð fyrir 31. desember 2024.

Lilja Alfreðsdóttir, mennta- og menningarmálaráðherra, kynnti frumvarp um opinberan fjárstuðning við öflun og miðlun frétta og fréttatengds efnis. mbl.is/Hari

Til að meta hvort markmið laganna hafi náðst verður gerð úttekt á áhrifum og árangri stuðnings við einkarekna fjölmiðla fyrir lok árs 2023. Athugað verður skoðað hvort stuðningskerfið hafi náð fram þeim markmiðum sem að er stefnt með frumvarpinu. Í því sambandi skal m.a. kanna hvort stuðningskerfið hafi stuðlað að aukningu á miðlun frétta og fréttatengds efnis einkarekinna fjölmiðla, hvort hlutfall efnis sem byggist á sjálfstæðri frétta- eða heimildaöflun hafi aukist, hvort starfsfólki á ritstjórnum fjölmiðla hafi fjölgað og fleira.

Tilkynning á vef Stjórnarráðsins.