Katrín Jakobsdóttir forsætisráðherra kynnti drög að lagafrumvarpi um kynrænt sjálfræði á ríkisstjórnarfundi í gær.
Frumvarpið miðar að því að virða og styrkja sjálfsákvörðunarrétt hvers einstakling en í því er lagt til að staðfestur verði með lögum réttur einstaklings til að breyta kynskráningu sinni í samræmi við eigin upplifun og án þess að þurfa að sæta þar um skilyrðum líkt og núgildandi lög gera. Þetta kemur fram á vef Stjórnarráðsins.
Þar kemur fram að tillagan sé í samræmi við stefnuyfirlýsingu ríkisstjórnarinnar þar sem segir að hún vilji koma Íslandi í fremstu röð í málefnum hinsegin fólks með metnaðarfullri löggjöf um kynrænt sjálfræði í samræmi við nýútkomin tilmæli Evrópuráðsins vegna mannréttinda intersex- fólks. Í þeim lögum skyldi kveðið á um að einstaklingar megi sjálfir ákveða kyn sitt, kynvitund þeirra njóti viðurkenningar, einstaklingar njóti líkamlegrar friðhelgi og jafnréttis fyrir lögum óháð kynhneigð, kynvitund, kyneinkennum og kyntjáningu.
Drögin hafa verið birt í samráðsgáttinni þar sem almenningur og hagsmunaaðilar geta sent inn umsögn við efni frumvarpsins.