Tólf snjóflóð hafa fallið á Austfjörðum síðasta sólarhringinn samkvæmt skrá Veðurstofunnar um snjóflóðatilkynningar. Þá hafa 32 snjóflóð fallið á öllu landinu síðustu tíu daga. Fróðárheiði var til að mynda lokuð um tíma í gær eftir að snjóflóð féll á Flateyrarveg og á mánudag féll snjóflóð á þjóðveginn um Hvalnes- og Þvottárskriður skammt frá Djúpavogi.
Samkvæmt upplýsingum frá ofanflóðaeftirliti Veðurstofunnar er talsvert nýsnævi til fjalla á landinu eftir éljagang undanfarna viku og hefur snjór safnast í skafla hlémegin í landslagi og víða er bert á milli. Þá geta veik lög verið í og undir nýja snjónum.
Viðvaranir vegna snjóflóðahættu eru í gildi á norðanverðum Vestfjörðum þar sem nokkur hætta er talin á snjóflóðum en töluverð hætta er talin á snjóflóðum á utanverðum Tröllaskaga og á Austfjörðum. Það hlýnar í veðri á morgun með vaxandi suðaustanátt, 13-20 metrum á sekúndu og slyddu eða snjókomu sem síðar breytist í rigningu, en þurrt verður norðaustanlands fram undir kvöld.