Frábært veður er á skíðasvæðum höfuðborgarsvæðisins, sól og logn, en ekki eru margir á skíðum, segja starfsmenn skíðasvæðanna í Bláfjöllum og Skálafelli.
Einar Bjarnason, rekstrarstjóri í Bláfjöllum, var að koma af skíðum þegar blaðamaður mbl.is náði í hann og segir hann færið frábært en það sé ekkert launungarmál að snjórinn mætti alveg vera meiri. Allt bendi til þess að úr því rætist í vikunni því spáð er töluverðri snjókomu og því verði væntanlega nóg af snjó í brekkunum næstu daga.
Í Skálafelli er færið gott en heldur hart en þar líkt og í Bláfjöllum er nýbúið að troða. Engar raðir eru við lyfturnar og hvetja starfsmenn skíðasvæðanna fólk til þess að drífa sig á skíði í blíðunni enda stórkostlegt veður að þeirra sögn, heiður himinn og sól.
Í Hlíðarfjalli er nýfallinn snjór og allar brekkur troðnar. Að sögn starfsfólks er veðrið frábært og talsvert af fólki á skíðum. Stromplyftan er biluð en aðrar lyftur opnar. Þrátt fyrir að það hafi snjóað töluvert fyrir norðan er ekki öruggt að skíða utan brauta þar sem grjót stendur upp úr.