Héraðsdómur Reykjaness dæmdi á föstudag karlmann í 18 mánaða fangelsi fyrir nauðgun sem átti sér stað í janúar 2015. Hann var jafnframt dæmdur til þess að greiða brotaþola, sem er fyrrverandi unnusta hans, 1,2 milljónir króna í miskabætur.
Konan kærði nauðgunina nokkrum dögum eftir að hún átti sér stað og lýsti því þá þannig fyrir lögreglu að hún og maðurinn hefðu haft samfarir með beggja vilja á laugardagskvöldi, farið svo út að skemmta sér og síðan komið heim og haft samfarir að nýju. Eftir það hafi konan viljað fara að sofa, en maðurinn „viljað frekari samfarir“ og í kjölfarið nauðgað henni tvisvar þá nóttina.
Ákærði neitaði sök, en brotaþoli var með nokkra áverka á kynfærasvæði samkvæmt skoðun á neyðarmóttöku og hefur „verið sjálfri sér samkvæm um meginatriði málsins“ allt frá því að hún leitaði þangað til skoðunar.
Dómari mat framburð konunnar trúverðugan, en einnig kemur fram í niðurstöðunni að dómara þótti SMS-skeyti sem maðurinn sendi konunni veita ákærunni „verulega stoð“. Þar bauð maðurinn fram sættir, sagðist vona að konan gæti fyrirgefið sér og að hann hefði verið of ákafur við hana.