Varla var stætt á Hellisheiðinni er stór vöruflutningabíll fór út af veginum og lagðist á hliðina rétt fyrir neðan Bolaöldu, í nágrenni Litlu kaffistofunnar, í morgun. Hellisheiði og Þrengslum var lokað um tíma vegna veðurs, en búið er að opna vegina á ný.
Að sögn varðstjóra hjá slökkviliðinu á höfuðborgarsvæðinu var veðrið „stjörnuvitlaust“. „Þarna í morgun varð allt í einu snarvitlaust veður og annaðhvort fýkur hann út af eða gerist eitthvað,“ segir hann og kveður bílinn hafa endað á hliðinni.
Er slökkviliðið kom á staðinn var vart stætt á veginum og því erfitt að athafna sig. Ökumaðurinn var fluttur á slysadeild Landspítalans, en meiðsl hans eru þó ekki talin alvarleg.
Flutningabíllinn liggur enn á hliðinni, en verið er að vinna í að koma honum aftur upp á dekkin. Fulltrúi frá Heilbrigðiseftirlitinu er á staðnum þar sem atvikið átti sér stað á ytri mörkum vatnsverndarsvæðis.